O mar levou unha ponte na praia de Remior, ocasionou danos nos aseos de Benquerencia e moveu as escaleiras situadas fronte ao Cámping Gaivota. O alcalde subliña que os danos son cuantiosos e agarda que todo se poida poñer en servizo pensando na semana santa.

O alcalde, Alfonso Fuente, fixo hoxe balance dos danos causados polo mar nas últimas horas nos areais do municipio. O rexedor subliñou que levou unha ponte en Remior, moveu as escaleiras situadas fronte ao cámping Gaivota e ocasionou danos nos aseos de Benquerencia. Non houbo que lamentar danos persoais.

Fuente Parga, que estes días se atopa en Fitur en Madrid, sinalou que “os datos que nos deixa a desfeita realizada polo mar no día de onte son que levou a ponte de Remior, causou desperfectos nos aseos de Benquerencia e as escaleiras que están fronte ao Cámping Gaivota tamén as moveu. Son eses tres danos, eu pensaba vendo os vídeos da xornada de onte que poderían ser máis cuantiosos, estes son importantes e a ver si podemos poñer todo en servizo xa de cara á Semana Santa e como non antes do verán, claro”.

O alcalde barreirense dixo que “non houbo que lamentar danos persoais. Sempre se avisa moito e cada vez a xente está máis concienciada. Parece bonito ver esa actuación do mar, pero hai que apartarse porque como se ve parece que non vai chegar, pero de repente unha ola, un golpe de mar se adentra en terra e pode ocasionar danos persoais. Por iso insistimos en que cando se dean estas circunstancias debemos evitar todos achegarnos á costa”.