BANDO EN RELACIÓN CO ECLIPSE SOLAR DO 12 DE AGOSTO DE 2026

Barreiros será un dos lugares nos que a observación da eclipse total do vindeiro 12 de agosto pode ter maior duración, sempre que a meteoroloxía o permita.

Tendo en conta a época na que se produce dito fenómeno e a situación en canto a capacidade municipal de atención e garantía da seguridade veciñal, esta Alcaldía quere poñer en público coñecemento as cuestións seguintes:

PRIMEIRO.- Lugares con restricións de acceso, durante todo o día 12 de agosto.

1.- Os accesos do noso concello a Comado, Penabor e Cornería estarán restrinxidos a vehículos a motor, a fin de evitar atoamentos. Estes puntos serán accesibles a pé.

Tamén estará restrinxido o acceso de vehículos á zona do Círculo Lítico da Roda, en Reinante, aínda non sendo lugar propicio para a observación, pola súa vinculación simbólica, a efectos de garantir a súa conservación e para previr unha posible presión de visitantes ou comportamentos inapropiados

2.- Neste sentido, no Santo Estevo do Ermo, aínda sendo un lugar no que non se observará a eclipse pola súa situación, queda restrinxido o acceso total en aras da súa protección en canto a capacidade de acollida.

3.- Non se permitirá o uso da pasarela elevada de madeira – no ámbito do Concello de Barreiros-  que une as praias de Arealonga e As Catedrais.

4.- Non poderán utilizarse os miradoiros de madeira situados sobre a ría, ao longo do Camiño Natural Ruta do Cantábrico

5.- Estará prohibido o acceso á zona do espigón a Anguieira, así como á zona dunar entre Punta Anguieira e Altar.

6.- Prohíbese expresamente saír fóra do paseo marítimo en calquera punto e, especificamente, na zona da Punta do Castro (ou Punta do Gavito) en San Miguel e do Castro de San Bartolo.

SEGUNDO.- Está permitido o acceso ás praias- a excepción das zonas dunares-. Ademais, queda prohibido o baño a partir das 19.00h do día 12 de agosto.

TERCEIRO.- O Concello de Barreiros pon a disposición da veciñanza 1.440 lentes para a observación do eclipse (440 cedidas pola Presidencia da Deputación de Lugo e 1.000 cedidas pola Vicepresidencia da Deputación de Lugo). Poderán recollerse presencialmente na Oficina de Turismo, limitándose a unha por persoa presente no momento da entrega. O Concello repartirá exemplares ás crianzas do campamento de verán e ao persoal municipal.

CUARTO.- Faise un especial chamamento á responsabilidade tanto nos desprazamentos coma na observación da propia eclipse, facendo caso das recomendacións emitidas polos correspondentes organismos e contribuíndo ao bo desenvolvemento da xornada. Poden consultarse ditas recomendacións na páxina municipal barreirosturismo.gal

QUINTO.- O Concello de Barreiros habilitará na medida das súas posibilidades un operativo composto por persoal municipal e voluntariado de Protección Civil co fin de informar e contribuír a unha maior seguridade no desenvolvemento da eclipse.

SEXTO.- Con motivo de eventos ou circunstancias alleas a este Concello poden producirse afectacións ao tráfico, especialmente na zona de praias, das que daremos traslado segundo nos vaia chegando a información.