O servizo de Salvamento e Socorrismo de Barreiros conta dende onte con catro socorristas máis durante a semana e dous novos para as fins de semana. O alcalde, Alfonso Fuente, lembra que de luns a venres 17 socorristas e 2 técnicos velan pola seguridade dos bañistas nas praias de Barreiros e 19 socorristas máis 2 técnicos traballan as fins de semana. O rexedor agarda poder contar con algún máisen datas próximas e subliña que o servizo está a funcionar moi ben debido á súa implicación e á distribución polos areais.

O Concello procedeu ao cambio de ubicación da parada de taxis para mellorar a seguridade dos usuarios. Antes atopábase situada a carón da N-634 e agora está na propia praza do Concello. Na vella parada creouse unha praza de aparcamento para persoas discapacitadas.

A Concellería de Medio Ambiente, consciente da importancia de concienciar á cidadanía na necesidade de manter  limpo o litoral e preservar o medio ambiente, desenvolverá unha campaña de sensibilización nas praias baixo o lema Que o que volte ás nosas praias sexas ti.

O alcalde, Alfonso Fuente, fai unha chamada á colaboración veciñal para que o lixo se deposite correctamente nos contedores habilitados para este fin. O rexedor denuncia que nos verdes e amarelos se detectou nos últimos días unha presenza importante de cartóns, e engade que “algunha xente está a tirar no contedor verde, herba do segado dos xardíns e tamén pequenos escombros”. A empresa que retira o lixo advirte que, ante esta situación, eses contedores quedarán sen recoller.

Barreiros acolle a representación do espectáculo Falar sen Cancelas este domingo, 11 de xuño.

O alcalde, Alfonso Fuente, pediulle á conselleira de Medio Ambiente, Beatriz Mato, que se axilicen os trámites para a construción da nova depuradora en San Miguel de Reinante. Nun encontro mantido nas últimas horas o rexedor barreirense trasladoulle á titular de Medio Ambiente que “non se pode esperar máis tempo por esta obra”.

Cerca de 40 barreirenses realizaron o pasado sábado a sexta etapa da súa peregirnación a Santiago de Compostela. Foron 20 quilómetros, os comprendidos entre Casanova (Palas de Rei) e Ribadiso (Arzúa). Entre a expedición atopábase Alejandra, unha nena de 9 anos que completou por primeira vez esa distancia. O concelleiro de Medio Ambiente, José Manuel Gómez Puente, explicou que "gozamos dun día espléndido e sen percances no camiño. Xa só nos quedan 41,5 quilómetros para chegar a Santiago".

O alcalde, Alfonso Fuente, e a concelleira de Cultura, Adela Rodríguez, entregaron os premios aos gañadores dos Concursos de Narración e Debuxo Letras Galegas 2017, na súa fase local. O acto tivo lugar na Biblioteca Pública Municipal. E nas últimas horas tivo lugar a clausura do curso de relaxación e concentración para nen@s e moz@s, que se celebrou de xaneiro a maio, organizado pola OMIX barreirense.