O vindeiro martes, 26 de agosto, ás 12 horas, o centro sociocultural de San Cosme acollerá unha actuación familiar a cargo de Pakolas e a debuxante Laura Romero.

O espectáculo, “Ecoralia, canta, conta e debuxa“, preséntase como un espectáculo de gran interacción coas nenas e nenos onde a música de Pakolas, acompañada por contos, historias e as cores dos debuxos en directo de Laura Romero son o principal atractivo para o público. Esta proposta multidisciplinar crea así unha escena na que non só se pode gozar da música, senón tamén do debuxo e as cores que a rodean. Un espectáculo para todos os sentidos.

Esta actuación enmárcase no programa Cultura no Camiño da Xunta de Galicia e no Plan de Cooperación cos Concellos da Deputación de Lugo.

• - Martes 26 de agosto
• - Ás 12:00 horas
• - No centro sociocultural de San Cosme
• - Entrada de balde ata completar aforo